அவளுக்கு “அமுதென்றும்” பேர் -05

பெருந்தீயின் 
நுனி ஜ்வாலை 
அறுந்து அறுந்து காற்றில் 
கரைந்து விடுவது போல 


என் 
ஜீவ செல்கள் 
ஒவ்வொன்றாய் 
அவளில் 
கரைந்துபோக 
சாபமிடுங்கள்..!
***

வழிப்பயணிக்கென 
விளைந்து நிற்கும் 
காட்டு கனிமரங்கள் போல


என் 
வழியெங்கும்

வியாபித்திருக்கும்

விநோதா

அவள்.

***

திமிருக்கு திமிர் அழகு

தான்
அழகென்ற திமிர் அவளுக்கு.

‘என்னிடம்
எது அழகு சொல்?’,  என
நிமிடத்திற்கு 
எண்பது தடவை
கேட்டு வைக்கிறாள்.

உங்களிடம்
சொல்வதற்கென்ன?

திமிர் தான் அழகு
அவளக்கு!


****

காதல் பரிசு

( வீட்டுத்தோட்டத்தில்...)

பறிக்காமல்
செடியுடன் காம்பை பிடித்து,

கொடுப்பது போல்
நான் பாவனை செய்ய,
பெறுவது போல்
நீ பாவனை செய்ய

நிறைவேறியது
நம்
காதலர் தின
பரிசு பரிமாற்றம்!

பறிக்கப்படாத
அந்த வண்ண ரோஜா
பகிர்ந்த வண்ணமிருக்கிறது
தோட்டத்துப் பூக்களிடம்.

நம்மையும்,
நம் காதலையும்!

**************************************

* காதலை போற்றும் அனைவருக்கும் எங்கள் அன்பு வாழ்த்துக்கள்.

திருமண நாள்

இன்று துவங்குகிறது
இல்வாழ்வில் ஆறாம் ஆண்டு
இன்னும் வேண்டும் எனக்கு
உன்னோடு வாழும் நூறாண்டு.

எட்டில் கிட்டிடும்
ராஜயோகம் - என்பார்கள்
உண்மை தான்!
ஈராயிரத்தேழு பிப்ரவரி
எட்டில் கிட்டியது - உன்னால்!

ஒளிக்குவலையே நீ
உள் நுழைந்த நேரம்
உறவுகள் சூழ்ந்தது
ஒளிக்கற்றையாய்!

உன்னில் வாழ்தல் எனது தவம்
உன்னால் வாழ்தல் எனது வரம்

அன்றில் போல் என்றும்
ஒன்றி நாம் வாழ
ஆசிர்வதிக்கட்டும்...!

***

(குறிப்பு :  எங்கள் வாழ்வு வசப்பட்ட நாள் - 08/02/2007.)